ANT ETKENMEN
Ant etkenmen tatarlarnıñ yarasını sarmağa,
Nasıl bolsun bu zavallı qardaşlarım çürüsin?
Onlar içün ökünmesem, qayğurmasam, yaşasam,
Yüregimde qara qanlar qaynamasın, qurusın!
Ant etkenmen şu qaranğı yurtqa şavle serpmege,
Nasıl bolsun iki qardaş bir-birini körmesin?
Bunı körip buvsanmasam, muğaymasam, yanmasam
Közlerimden aqqan yaşlar derya-deñiz qan bolsun!
Ant etkenmen, söz bergemen bilmek içün ölmege,
Bilip, körip milletemniñ közyaşını silmege.
Bilmey, körmey biñ yaşasam, qurultaylı han bolsam,
Yine bir kün mezarcılar kelir meni kömmege!...
Noman Çelebicihan
АНТ ЭТКЕНМЕН
Ант эткенмен татарларнынъ ярасыны сармагъа,
Насыл болсун бу заваллы къардашларым чюрюсин?
Онлар ичюн окюнмесем, къайгъурмасам, яшасам,
Юрегимде къара къанлар къайнамасын, къурусын!
Ант эткенмен шу къарангъы юрткъа шавле серпмеге,
Насыл болсун ики къардаш бир-бирини корьмесин?
Буны корип бувсанмасам, мугъаймасам, янмасам
Козьлеримден акъкъан яшлар дерья-денъиз къан болсун!
Ант эткенмен, сёз бергемен бильмек ичюн ольмеге,
Билип, корип миллетемнинъ козьяшыны сильмеге.
Бильмей, корьмей бинъ яшасам, къурултайлы хан болсам,
Йине бир кунь мезарджылар келир мени коммеге!...
Номан Челебиджихан
